كتب – ضياء سعيد “الشناوي”
أعلن النجم تامر حسني عن تحقيق أحدث أفلامه “بحبك” أعلى إيرادات في تاريخ السينما العربية.
ونشر تامر حسني عبر حسابيه في “فيسبوك وإنستجرام” تقريرًا صادرًا عن شركة “أورينت الدولية”، المسؤولة عن توزيع أفلامه عالميًا.
ذكر أن فيلم “بحبك” حقق أعلى حضور جماهيري لفيلم عربي على مستوى العالم، حيث حضره مليونان و600 ألف شخص خلال شهر ونصف، كما اقترب الفيلم من تحقيق إيرادات تبلغ 600 مليون جنيه، في ظاهرة تعد الأولى من نوعها في السينما العربية.
ووجه تامر حسني بهذه المناسبة رسالة للشباب قال فيها: “الحمدلله من جد وجد و ربنا بيكرم على قد التعب، الحمدلله عشان نجحت و حققت الإنجازين دول و اثبت اني كنت شايف صح و صاحب رؤيه و شخصيه فنيه مستقله مبتمشيش غير ورا قناعتها اللي بتتبني بعد دراسه كبيره للأشياء حبيت اقول للشباب مفيش مستحيل”.
وأضاف: “بقول الكلام دا عشان يكون قدامكو عبره واضحه تخليكو متيأسوش و دايمًا عندكوا امل و ولا يهزكوا أي حروب و احقاد و ناس مأجوره كل دا “بلح” جانب الإجتهاد الحقيقي، و الانسان لما يبقى عنده تحدي قوي مؤمن بيه، اللي بيطلع من القلب بيوصل للقلب ولا يصح الا الصحيح، و اوعى تفتكر ان في مخلوق على الأرض يقدر يوقف رزقك، هيجيلك يعني هيجيلك ما دام اجتهدت و عملت اللي عليك”.
وتابع: “شكرًا سينرچي و سكاي ليميت و فيلم سكوير و TH برودكشن و اورينت الدوليه، انكم صدقتوني لما قولتلكم ان شاء الله هنعمل انجاز تاريخي بفيلم رومانسي في عصر العنف و القتل، و هنرجع نحب ونرجع المشاعر تاني، اهو الإنجاز بقى انجازين رقم عمري ما طلبته من ربنا لإنه عمره ما يجي في خيالي”.
و استكمل: “كنت اطمح في ربعه و عدد زوار الفيلم ربنا كرمنا و فخور كل الفخر بأن أعلى رقمين في تاريخ السينما على مر العصور تم تحقيقهم، بفيلم من تأليفي و موسيقتي التصويريه و إخراجي، الحمدلله و مليون مبروك لجميع ابطال و صناع الفيلم، و كل الشكر الجمهور المصري و العربي و العالمي اللي شرفنا و تسبب في هذا الحدث العظيم في حياتي”.
وفيلم “بحبك” من إنتاج شركة سينرجي، وفيلم سكوير، وسكاي ليميت و THبرودكشن، تأليف وإخراج وبطولة تامر حسني، إلى جانب هنا الزاهد، هدى المفتي، حمدي المرغني ومدحت إسماعيل.
