كتب- هبة القاضي
أعرب الفنان فاروق فلوكس، عن استيائه من سخرية محمد رمضان، لتجسيده شخصية صبي العالمة في فيلم “الراقصة والسياسي”.
قائلًا: ” أعتقد أنه شافني في الدور وهو صغير، ولكن مكانش يقدر يقول الكلام ده قبل ما يجيله الملايين اللي بيكسبها دلوقتي، وبقا بيتكلم بفلوسه مش بلسانه، وأنا مش زعلان من كلامه”.
وأضاف: “زي ما هو ميقبلش يعمل دور صبي عالمة، أنا كمان لا أقبل تجسيد شخصية بلطجي أو واد صايع بسكينة في الشارع، لأن أعماله مسيئة للفن المصري والشباب، وهو دخل في حتة مش بتاعته، لإنه هاجم فريد شوقي، فهل المنطقي كل واحد ياخد كام مليون ييجي يهاجم الكبار”.
وتابع:” أنا ماعملتش دور صبي الرقاصة فقط، أنا عملت أدوار تانية مهمة، وكتير فالجيل الحالي يتمنوا يقدموا نفس الأدوار دي، وده لأهميتها، زي دوري في دموع في عين وقحه، بطولة عادل إمام، ودي لغة الفن اللي مابتمشيش بنوعية واحدة، جميع أدواري اللي قدمتها على مدار مشواري الفني بقدم شخصيات مختلفة، وهي دي اللي الناس بتصدقها”.
واستطرد: “محمد رمضان ممثل كويس ماقولناش حاجة، بس لازم يروح يعالج نفسه عند دكتور نفسي، كون أنه دايما بيقارن نفسه بالكبار، وبيقلل من قيمتهم الفنية والشخصية، وهو لسه مهما كان مابقالوش كتير في الساحة الفنية، يدل على أنه غير سوي، وأنه من الشخصيات الحقودة دائما على الأنجح منه، وهو شاء أو أبى فهو جنب فريد شوقي وغيره من زمن الفن الجميل فنان صغير جدا”.
وأردف: “اللي يعيش عصر فريد شوقي هيعرف أن مكنش في شباب بيمسك السلاح في أيده وهو رايح الفرح، ولا كان فيه شباب بتقتل عشان المخدرات، زمان كل الشباب رجالة بجد عشان كان فيه حاجة اسمها حرب، وهو طبعا استحالة هايفهم حاجة زي كده، فريد شوقي كان الملك في المجال ولازال الملك، لكن أنت بقا ملك ايه.. ملك الحواري للشوارع والعيال البايظة، ولا ملك المهرجانات والإسفاف، لا بد من معالجة محمد رمضان نفسيا مع احترامي ليه وهو ممثل شاطر”.
ووجه الفنان الكبير فاروق فلوكس، نصيحة لـ محمد رمضان قائلا: “أرجو منك متهاجمش القمم القديمة ولا الحديثة، عمر حد مننا طلع قال أنا نمبر واحد في العالم، ليه يا محمد يابني ده من تواضع لله رفعه”.
