ميار الببلاوي : ربنا شاهد إني بتكلم بعفوية
كتب – زينب غازي
كشفت الفنانة ميار الببلاوى عن دخولها في حالة اكتئاب وابنها حزن وتأثر كثيرا، بسبب ما يكتب عنها في المواقع.
ونشرت الفنانة ميار الببلاوي رسالة إلى جمهورها، بعد تعرضها للانتقادات، لتوضح أنها لم تقصد أن تتصدر التريند بتصريحاتها عن مشاهدها الجريئة في فيلم “ديسكو ديسكو” أو حديثها عن زملائها الفنانين خلال لقائها في أحد البرامج.
وكتبت الفنانة عبر حسابها على موقع التواصل الاجتماعي فيسبوك “أنا مش هدافع عن نفسي ومش هقول إني صح بس ربنا شاهد إني بتكلم بعفوية ومبعرفش تتخابث ولا قصدى أي إساءة لأي حد من زملائي اللى بحبهم وبقدرهم وبعتز بأي عمل شاركتهم فيه طوال السنين الي فاتت، وأنا لا عاوزة أجيب سيرة الفيلم ولا المشهد ولا يشرفني.. ونفسي أنسى والناس تنسى بس معرفش ليه بعد 25 سنة بينبشوا في الماضي.. في فنانات عاملين مئات الأفلام وفيها مشاهد نسأل الله المغفرة اشمعنى ميار اللي لازم تترجم وتتبهدل وكل اللي عاوز يعمل شو يبقى عليا”.
واستمرت: “أنا برفض كل يوم مقابلات في برامج لكن مروة صبري أخت زميلتي عبير وبحبهم هما الاثنين غير كده أنا حرمت أي مقابلة غير لما أعرف طبيعة الأسئلة وهركز فى كل كلمة ومش هذكر أسماء ولا مواقف بس الصحفيين واليوتيبورز يرحموني من العناوين اللي ملهاش علاقة بالكلام اللي جوه الفيديو”.
و أضافت : بالنسبة للتريند اللي أنا عايزة أركبه -حد الله- أنى أركب التريند بشتيمة الناس ليا وعشان أكد لكم أنا محولة موبايلي ومبردش على أي صحفي.. أنا نفسيتي تعبت وجالى اكتئاب وابني مضايق جدا وأختي كده كفاية، وبالنسبة لأنى بعمل كده علشان أنا اتنسيت وعندي حب للظهور قولوا اللى يعجبكم أنا ناجحة في برنامجي ولله الحمد وراضية بيه ولو جالي شغل فدا رزق أشكر عليه ربنا مجاليش مش هلجأ للطرق الرخيصة دي علشان أشتغل وبالنسبة للميكب والرموش والضوافر حاضر هشلهم علشان أبقى كده واجهه للحجاب دا كل اللى عندى وأفوض أمري إلى الله إن الله بصير بالعباد”.
وظهرت ميار الببلاوي في برنامج “قعدة ستات” من تقديم مروة صبري عبر قناة “القاهرة اليوم” وتحدثت عن مشاهدها الجريئة في فيلم “ديسكو ديسكو” وحكت كواليس تصويرها في رمضان.
وقالت “الفيلم كله متصور في رمضان وأنا عندي عقدة من موضوع رمضان دا، آه كنت شابة وبلبس عادي، لكن كان في مشهد مع عمرو عبد الجليل مكنتش عاوزة أصوره لأن كنا في رمضان لدرجة أني دخلت الحمام وقفلت على نفسي بالمفتاح وقعدوا يخبطوا عليا كنت مستنية المغرب يأذن قلت لنفسي حتى لو استغفر الله العظيم هعمل حاجة غلط ميبقاش في الصيام”.
يذكر أن ميار الببلاوي ابتعدت عن التمثيل منذ فترة، وتقدم برامج تليفزيونية تهتم بكل ما يخص المرأة والمجتمع وتنقلت بين العديد من القنوات الفضائية، وتقدم حاليا برنامج “نادي النساء السري”عبر قناة “الشمس”.
