ميرهان حسين بعد أدائها لمناسك العمرة تتعجب إزاي حد ينكر وجود ربنا
كتب-روان حمدي
نشرت الفنانة “ميرهان حسين” صورة لها على موقع التواصل الإجتماعي “إنستجرام”، وهي أمام “الكعبة” تؤدي مناسك العمرة.
وعلقت ميرهان قائلة: “مع إن الصورة دي من أحب صوري لقلبي، اترددت أنزلها، أولًا خفت إن ده يأثر على ثواب حاجة بيني وبين رب العالمين، ثانيًا عارفة إن في ناس سطحية كتير هايكتبوا كومنتات كلها ايه ياطاهرة وياست الشيخة، ويعملوا أنهم مابيغلطوش أبدًا، وجايين يحكموا على ناس زيهم أحكام هبلة وخلاص، وهما ما يعرفوش اللي بينك وبين ربنا، ولا عمرهم هايعرفوه”.
واستكملت: “بس قولت لا مش همشي ورا الفكر ده وهانزل صورتي اللي بحبها، عشان فيها ذكرى وجودي في أطهر بقاع الأرض، وأنا ضيفة في بيت الله الحرام، وبحتفل فيها بنعمة من أكبر النعم هي نعمة إن ليا رب عظيم اسمه “الكريم” اللي ممكن أطلب منه أي شيء، ومفيش حاجة كبيرة عليه، “إنما أمره إذا أراد شيئًا أن يقول له كن فيكون”.
وأضافت “ميرهان”: “نعمة وجود ربنا في حياتنا أكبر من كل النعم، أنا حقيقي معرفش إزاي في ناس بتلحد وبتنكر وجود ربنا والعياذ بالله، وفي منهم أصحاب ليا وناس بقابلهم، ومن حبي ليهم بس بقولهم فايتكم أعظم حاجة في الوجود، أن يبقي ليك رب قادر على تحقيق كل اللي يتمناه قلبك ويسرح فيه خيالك، رب أكبر من كل كبير، هو الأمان في الدنيا دي، وكل من عليها فان”.
