ابراهيم سلطان الفردى عاوز الحق ولا ابن عمة لا ابن عمة
وانت بتشوف الناس وعينك تيجي في عنيهم وملامحك تقرب من ملامحهم بتكشف حاجات كتير .. في ناس عيونهم مرتعشه وفي ناس حاده في ناس خبيثه في ناس شريرة وهكذا العيون تفضح والملامح كمان بحركاتها بتفضح اكتر .. فاللي بيخاف مثلا ملامحة تختلف عن الغاضب او الحزين وبالتالي العيون بتاخد مسحه من الحاله النفسيه وتعكسها .. ففي ناس مكشوفة جدا وهي فاكرة نفسها ذكيه وفي ناس مفضوحة اوي وهما فاكرين العكس انه كله في السكرته .. ندخل بقا علي المهم في ناس حتموت نفسها وتبقي حاجه وعشان مش عارفين يكونوا حاجه بيعملوا اي حاجه تلفت انتباه الناس زي نشر بوست يفرقع .. نقل معلومة كذب عشان الناس تهتم وتسأل .. عمل حفلة عشان يكون محور الكلام .. واللي مش عارفين يعملوا حاجه عارفين نفسهم كويس انهم صفر ولا احلي من صفر المونديال اللي اخدناه زماااان لو فاكرين طبعا .. صفر ثقافة صفر معرفة صفر قدرة صفر فكر .. كذا صفر في بعض .. الناس دي عشان عارفة انهم زيرو معندهمش غير حلين والله مفيش تالت اما الفهلوة والتنطيط زي القرود وتطلع علي الاكتاف والتنطيط ده بيعمل شغل صورة هنا مقابلة هناك ومع كتر التنطيط يتعرف علي ناس تانيه يختار منهم اللي زيه بالظبط اللي هما ايه بالصلاة علي النبي احسن اصفار زيه لان النوعيات دي تخاف من المثقفين اوي تاخدها من قصيرها وتختار من الصحبه الحلوة ” مش بيقولوا مثل الطيور علي اشكالها تقع “اما ناس بتاعة شو او ناس بدور علي سبوبة او ناس بتشتغل ناس بمهنة وهمية او وظيفة او لقب ودول بقي كتير اوي اكتر من الهم علي القلب .. وسهل تعرف ده من صفحات الناس دي لانهم مفضوحين اوي تلاقي في معلومات صفحاتهم علي الفيس بوك مثلا المستشارة فلانه لحقوق الانسان ومستشارة الجهة الفلانية وسفيرة النوايا وخد بقا كم من الالقاب ولا احلي موقف القاب بيفكروني بمشهد عادل امام في فيلم مرجان احمد مرجان وهو بيشتري القصايد عشان ينشرها في كتاب باسمه الحلزونه وابيع نفسي .. بتوع التنطيط والصور واللي بيعتمدوا علي الفهلوة عشان يعملوا وجود والناس تتكلم عنهم نظام الفرقعة .. الحل التاني يكونوا تابعين يعني ايه تابع يعني اي مسئول يعرفة سواء بقا سابق او حالي كله شغال بس الافضل يكون حالي عشان لسه علي الكرسي وله كلمته وعشان يكون تابع لازم يهلل ويعظم وينفخ ويمدح ويشيل الشنطه ويجري للمحطة وحبة فوق وحبة تحت وهاتك هري في كل مناسبات الدنيا والاخرة عشان المسئول ده يحطة في دماغة والمسئول نفسه حتي لو كان وزير او محافظ بيحب النوع ده اوي اولا عشان بيرضي غروره النفسي بالمنصب ثانيا بيعمل حاشية يعني في ناس حواليه عبد المأمور اعمل نفذ هات سلم والمسئول لو حضر اي مكان تلاقي النوع ده يجري يحضن ويبوس الايادي ويفتح باب العربيه وناقص يشيل المسئول ويقعدة علي كرسية وعشان بقا تابع وبيسمع الكلام ممكن يعمل اي شغلانة المسئول عاوزاها وهو كمان يطلب من المسئول اي طلب مثلا تزكية دعوة حفلة سهرة شوية طلبات سهلة في ايد المسئول ومش محرجة شغل سقسقة .التوليفة دي عاوزة بقا تكون حاجه تبدأ بقا تشغل نفسها بالانتخابات .. حيموتوا وياخدوا الحصانة ويحملوا بقا لقب نائب يا سلام سلم يا جدعان .النوع ده مش فارقة معاه لا كرامة ولا يحزنون هو في طبال بيطبل ولا زمار بيزمر ويغطي دقنة طبعا مفيش وعشان كده اي خن يدخلوا فيه اي مصلحة اي سبوبه اي باب واللي يطلب منهم يتعمل المهم انهم يترشحوا في الانتخابات ويا سلام في قايمة مضمونة لان لو فردي حيكون صعب ان لم يكن مستحيل .. اول ما تسأل النوع ده من الناس اللي بيمحلس وبيتمسكن وبيعمل البدع عشان يوصل انت عاوز تترشح ليه ؟ يرد عليك عاوز اخدم مصر .. تساله هو انت خدمت مصر قبل كده يقولك يوووه كتير انا فدي البلد انا يااااما طلبوني مسئولين عشان خاطر مصر .. تساله طيب انت عملت ايه عشان مصر ؟ يقولك مفيش انتخابات منزلتهاش ومفيش مناسبة مكنتش فيها وممكن يخبط علي قلبه ويغني اغنية مصر هي امي ونيلها هو دمي .. تساله طيب انت ايه اللي عملته للناس ؟ يرد يقولك انا برشح نفسي عشان اعمل للناس انا عندي افكار كتير حلوة بس عاوز فرصة تسالة هو انت محتاج كرسي عشان تشتغل وتعمل يقولك عشان اعرف اشتغل من قلبي وبكل عزمي ده انا راجل نبيل يا عم اسال عني .. تساله بحرارة انت محدش سمع انك عملت حاجه ولا في نظرك اللي بينفذ التعليمات ده شغل ولا اللي عمله حفلتين ولا راح له مؤتمرين ولا يعرف وزيرين ولا حافظ كلمتين ولا اللي عايش بوشين ينفع يكون نائب شعب يرد انتم كده لازم تطلعوا القطط الفطسانه مش عاجبكم العجب نقد وهجوم وخلاص انتم ايه خونة وضد البلد تبتسم وتقوله قصدك البلد اللي عاوز كعكه منها ولا سبوبه ولا عاوز تنط علي اي منصب او تلهف اي دور عشان تقول للناس انك اهو راجل واصل لفوق اذا كان من غير حصانة وانت فاسد وبهلوان حتعمل فينا ايه لو معاك حصًانة والمشرحة مش ناقصة معاتيه .. بص ليا والغضب بينط من عنية وقسماته تحولت الي شر وتشنج والعصبية ظهرت في حركات جسمهده حال ناس كتير شايفه الدنيا كده وان اللي ملوش قيمه الكرسي يعمله قيمة وانا وبس والنوع ده لو اتمكن بيكون مفسدة ومخرب ذمم ونفوس حتي لو كان مسنود زي ما بيقول او هبيش يهبش في اي حد يقرب من المسئول بتاعةبدلا من إعطاء السياسي مفاتيح المدينة ، قد يكون من الأفضل تغيير الأقفال.دوج لارسونواختم بجيفارا اللي قاللا تحدثني عن سياسي او رجل اعمال همهم الوحيد الربح، بل حدثني كيف يزهر الربيع و كيف يضحك الفقراء و كيف يعمل الكادحين و كيف حال الأوطان.
