*مؤسس”أمهات مصر” ترصد ملاحظات أولياء الأمور بعد الأسبوع الأول للدراسة
كتب_زينب غازي
“طمنونا عليكم بعد الأسبوع الأول للدراسة.. وهل ليكم اي ملاحظات؟”، بهذه الكلمات وجهت عبير أحمد مؤسس إتحاد أمهات مصر للنهوض بالتعليم، وإئتلاف أولياء الأمور، حديثها مع أولياء الأمور لمتابعتهم بعد مرور أسبوع علي بداية العام الدراسي.
وتفاعل العشرات من أولياء الأمور علي جروب إتحاد أمهات مصر للنهوض بالتعليم، وإئتلاف أولياء الأمور، حيث قالت ولي أمر:”ياريت الوزارة تكتفي بامتحانات الشهرية فقط لا داعي امتحانات الأسبوعية لأنها مجهدة للمدرسين والطلبة وتعطيل للوقت والمناهج فعلا كبيرة محتاجة وقت كافي للدراسة في المدارس وفي المنزل رجاء إعادة النظر في التقييمات الأسبوعية”.
وأضافت ولي أمر أخري: “التقييم الأسبوعي ضغط و عبء علينا وكفاية الامتحان الشهري والواجب اليومي خصوصا ان اليوم بقي طويل والأولاد بيرجعوا مجهدين جدا وللأسف بياثر علي المذاكرة”.
وقالت ولي أمر: “عجز المدرسين في المدارس الاولاد يأخدوا بالكثير 3 حصص، واليوم الدراسي طويل وبعض المدرسين بيستغلوا درجات اعمال السنة وخصوصا في المدارس الحكومية حدث ولا حرج”.
وتابعت أخري: “الإلتزام والحضور حاجه كنا افتقدناها و الطلبه كانوا نسيوا يعنى ايه مدرسه، مبسوطه من الانضباط الموجود حاليا”، وعلقت أخري: “موضوع أعمال السنة اللى فى ايد المدرس دة بجد عذاب وللأسف بعض المعلمين بيستغلوا ده، ياريت يكون في رقابة ومتابعة مت الوزارة علي المعلمين وخاصة فيما يخص أعمال السنة”.
وأوضحت ولي أمر أخري: “ياريت الأهتمام بالمرحلة الثانوية بالمدارس وخاصة أولي وتانية ثانوي، حصص أحتياطي ونقص كبير في المعلمين”، وتابعت أخري: ” الحقيقه الوقت طويل اوى طلاب الصف الثاني الثانوي واجهاد عليهم مفيش وقت يذاكروا مفرهدين حرفيا ..ولا داعى لتقييم اسبوعى مجهد ممكن التقييم شهرى ياريت نعيد النظر فى النقطه دى ،أيضا الوقت عنصر الوقت الرجوع من المدرسه وراها الدروس، إجهاد وضغط علي الطالب، نرجو الأهتمام بتنظيم الوقت ومواعيد الحصص عاوزين فرص الولاد تتنفس علشان نخفف الحمل عنهم ويزيد إستيعابهم بالإضافة للتقييم يكون شهرى هيكون افضل كتير لو سمحتم”.
