سارة التونسى تفتح النار على المنتج جمال العدل
كتب_ زينب غازي
فتحت الفنانة سارة التونسي النار بالهجوم على تصريحات المنتج جمال العدل في برنامج “حبر سري”، بشأن استبعادها من مسلسل “حرب أهلية”، بعدما صورت جزءا كبيرا منه، واستبدالها بالفنانة أروى جودة.
وكتبت سارة عبر حسابها على فيسبوك: “أستاذ جمال العدل أنا ماكنتش عارفه إني مضايقه حضرتك أوي كده، خصوصا بعد ما أنا كسبت القضية ضد شركة العدل جروب وحضرتك خسرت قضيتك ضدي”.
وأضافت : “بس ياااااه انت لسه فاكر؟ ده عدى على الموضوع ده أكتر من سنتين وأنا والله نسيت الموضوع (بس دي «والله» بجد مش زي بتاعتك) واشتغلت في بلدي وكسّرت الدنيا ولو عايزه اشتغل في مصر هاشتغل، أصل مصر دي كبيرة أوي يعني أكبر من حضرتك ومن أي حد، ولا إيه يا أستاذ جمال؟ مش انت إسمك كده برضه؟”.
وتابعت: “والله عيب على سنّك وتاريخك كمية الكذب اللي انت كاذبها بخصوصي في اللقاء ده (بس مش تاريخك كله يعني)، وكمان حركة إنك نسيت الإسم دي تقلّل منك مش مني، بلاش أقولك شكلك كان عامل ازاي وانت بتحلف إنك نسيت الإسم، عملتها قبل كده في إعلام بلدي تونس واترد عليك رد عظيم من المذيعة التونسية اللي كانت بتحاور حضرتك”.
واستكملت: “وعلى فكرة أنا مطلعتش برة مصر! أنا عندي بيت في مصر بزوره كل شهر تقريبا وبختار اشتغل إيه وماشتغلش إيه وأنا اخترت أركز في تونس وعملت بطولة مسلسل تونسي كسّر الدنيا السنة اللي فاتت والإعلام العربي كلّه اتكلّم عنه ويمكن عشان كده حضرتك افتكرتني تاني فجأة (ده لو كنت أصلا عرفت تنسى الدّرس) وإن شاء الله هيكسّر الدنيا في الجزء التاني السنة دي”.
وإستمرت: “أنا أكبر من إني اشتغل أي عمل وخلاص عشان بس أقول أنا موجودة، وده من زمان وانت عارف ده كويس واتكلمنا فيه لمّا حضرتك طلبت تقابلني في مكتبك عشان كنت عايز تمضي معايا عقد بـ٣ سنين بعد ما نجحت في دور شيرين في مسلسل بـ١٠٠ وش بأمارة ما قلتلي أنا محتاج روح جديدة ودم جديد عشان اللي عندي في الشركة كبروا خلاص وقلت كلام تاني كتير عنهم في غيابهم.. ولا نسيت دي كمان؟ ويومها أنا قلت لنفسي اللي يتكلم كده عن ناس اشتغلوا معاه سنين، يخوّف ورفضت أمضي مع حضرتك العقد ده يا أستاذ يا اللي ناسي إسمي. أنا عندي كلام كتير وخطير ممكن أقوله بخصوص حضرتك وبخصوص اللي انت قلته في برنامج حبر سري، بس للأسف عندي تصوير ومش فاضية، وكمان حزني على اللي بيحصل في العالم مخليني مستهيفة كل الحاجات دي”.
واختتمت: “حضرتك ولا اتعظت من عقاب ربنا وقتها بإن كل استديوهات ومخازن العدل جروب اتحرقت ولا اتعظت من إنك خسرت القضية وأنا اللي كسبت الحمد لله ولا اتعظت من اللي بيحصل الأيام دي.. مش عارفه أقولك إيه والله وبصراحة ولا عندي وقت أقول أصلا، كفايا عليك المشاكل اللي حضرتك عاملها مع نص ممثلين مصر”.
