سمية الخشاب : أنا من برج النحانيح 

كتب – زينب غازي

وجهت الفنانة سمية الخشاب النصائح لجمهورها،  فيما يخص الارتباط والزواج والحياة، بالتزامن مع الإحتفال بعيد الحب، ونشرت مجموعة من التغريدات عبر حسابها على تويتر.

كتبت «الخشاب»  قائلة :

 «أي حد في الحياة هدفه الارتباط أو شاغل جزء من تفكيره، اعرفوا إنه مفيش أمل فيه، حرق اوكسجين عالفاضي».

«هاكل سوشي وهاخد نفسي ف date (لوحدييييييي)».

«اتجوز وأنت عندك 40 سنة عشان تكون عملت فلوس كويسة وتعيش أولادك بمستوى كويس، هتتجوز بدري هتخلف 4 أو 3 ويطلعوا صايعين ويبقوا عالة على المجتمع».

وعندما رد عليها أحد المتابعين أن هذا السن يناسب أن يكون الشخص «جد» وليس لبداية حياة الزوجية، بينما السن المناسب من وجهة نظره 25 عامًا، ردت عليه «سمية» قائلة «اتجوز وانت عندك 25 ووريني إزاي هتربي وهتعلم وهتصرف على مراتك وعيالك، أهو التفكير اللي زي ده اللي بيسبب الأزمات الاقتصادية، فاكرين الجواز انجاز».

وتحدثت الفنانة كذلك عن الحب في برنامج «الستات» أنها لا تحب أن تعلق سعادتها بالآخرين: «مش لازم نعلق سعادتنا وفرحتنا بوجود حد في حياتنا، لو مش موجود أنا أقدر أسعد نفسي وأقدر أحب كل حاجة حواليا».

ودعت «الخشاب» السيدات إلى الاهتمام بنفسها وتدليلها، متابعة: «أنا بحب نفسي وبدلعها، وبعمل ماسكات لشعري وبلعب مع القطة بتاعتي، ومؤخرًا بعشق القطط، بقول للناس هاتوا قطط، واضربوا عصفورين بحجر، يبقى اتبنيتوا قطة من الشارع، وكمان هتعملكوا طاقة حلوة في البيت لأنهم بيمتصوا الطاقة السلبية».

 وتابعت: «لو زهقانة أو تعبانة وحضنت قطة هتلاقي نفسك ضحكتي، ولو عيانة هتخفي، لأن القطط بيصدروا موجات تمتص أي طاقات سلبية، اللعب مع الحيوانات بيخلي الست أسعد واحدة في الدنيا، ميقلوش عن الأطفال».

وتضيف الخشاب انا من برج النحانيح : « برج الميزان، وأصحاب البرج ده نحانيح أوي في الحب ويموتوا في الرومانسية وبيحبوا يسعدوا الإنسان اللى بيحبوه على حساب نفسهم، ولكن لما يحسوا إنه مش بيقدر، بينقلبوا عليه».

وأوضحت الخشاب أن «الحب لا يقتصر على العلاقة بين الرجل والمرأة فقط»، مشيرة إلى أن المرأة بإمكانها أن تحب ذاتها، وتشكر الله طوال الوقت على كل النعم التي أنعم بها عليها.